ଦିଗପହଣ୍ଡି, ୧୫/୦୮/୨୦୨୦:
ପୁଡ଼ାମାରି ପଞ୍ଚାୟତରେ ଚଳିତ ବର୍ଷର ପବିତ୍ର ସ୍ୱାଧୀନତା ଦିବସ ପାଳନ ବିନା ଜାକ ଜକମରେ ନିରାଡମ୍ବର ସହକାରେ ପାଳିତ ହୋଇଅଛି ।ପଞ୍ଚାୟତ ସ୍ତରୀୟ ଉତ୍ସବ ପାଳନ ଅବସରରେ ସରପଞ୍ଚ ଶ୍ରୀମତୀ ଭାଗ୍ୟଶ୍ରୀ ବିଷୋୟୀ କରୋନା କଟକଣା ଜନିତ କାରଣରୁ ସୀମିତ ପ୍ରତିନିଧି ଓ ବୁଦ୍ଧିଜୀବୀଙ୍କ ଗହଣରେ ଜାତୀୟ ପତାକା ଉତ୍ତୋଳନ କରିଥିଲେ । କରୋନା ମହାମାରୀର କରାଳ ଉତ୍ପୀଡନ ସମୟରେ ଆମ ସାନଖେମୁଣ୍ଡି ବ୍ଲକ ଓ ପୁଡ଼ାମାରି ପଞ୍ଚାୟତ ଜନ ସାଧାରଣଙ୍କ ଧୈର୍ଯ୍ୟପୂର୍ଣ୍ଣ ମୁକାବିଲାକୁ ନେଇ ପଞ୍ଚାୟତ ଅଧିବାସୀଙ୍କ ସହିତ ଅଞ୍ଚଳ ଜନସାଧାରଣଙ୍କୁ ସାଧୁବାଦ ଏବଂ କୃତଜ୍ଞତା ଜ୍ଞାପନ କରିଥିଲେ ।ଏହି ଅବସରରେ ଚଳିତ ବର୍ଷର ଯୁକ୍ତ ଦୁଇ ବିଜ୍ଞାନ ଫଳାଫଳରେ ପୁଡ଼ାମାରି ଜୁନିଅର୍ ବିଜ୍ଞାନ ମହାବିଦ୍ୟାଳୟର ସ୍ଥାନୀୟ ଛାତ୍ରୀ ସୁଶ୍ରୀ ରୋଜିରାଣି ପଶୁପାଳକ ସାନଖେମୁଣ୍ଡି ଟପ୍ପର ଭାବେ ୫୩୧ ମାର୍କ ରଖଥିବାରୁ ରୋଜୀଙ୍କୁ ନେଇ ଅଞ୍ଚଳ ଗର୍ବିତ ହୋଇଥିବା ଉଲ୍ଲେଖ କରିଥିଲେ । ଆୟୋଜିତ ଏହି ଦିବସ ପାଳନ ଅବସରରେ ପଞ୍ଚାୟତ ପକ୍ଷରୁ ରୋଜିରାଣୀଙ୍କୁ ପୋଡାମାରୀ ସରପଞ୍ଚ ସମ୍ବର୍ଦ୍ଧିତ କରିବା ସହିତ ପୁରସ୍କୃତ କରିଥିଲେ । ସେ ୮୮.୫ % ରଖି ସାନଖେମୁଣ୍ଡି ପାଇଁ ସୁନାମ ଆଣିଥିବା ନେଇ ପୁଡ଼ାମାରି ମହାବିଦ୍ୟାଳୟ ସହ ଅଞ୍ଚଳ ଜନସାଧାରଣଙ୍କୁ କୃତଜ୍ଞତା ଜ୍ଞାପନ କରିଛନ୍ତି ।
ରିପୋର୍ଟ – ସନ୍ତୋଷ କୁମାର ଦାଶ ।
