କୁକୁଡ଼ାଖଣ୍ଡି,୨୮/୦୮/୨୦୨୧: ଗଞ୍ଜାମ ଜିଲ୍ଲାର ହିଞ୍ଜିଳି ଥାନା ଅନ୍ତର୍ଗତ ଦୟାପଲ୍ଲୀ ଗ୍ରାମରେ ଜଣେ ମହିଳା ଗତକାଲି ଅପରାହ୍ନରେ ବଜ୍ରାଘାତରେ ମୃତ୍ୟୁବରଣ କରିଥିବା ସୂଚନା ମିଳିଛି ।ସୂଚନା ପ୍ରକାରେ ଜାଣିବାକୁ ମିଳିଛି ଯେ, ଦୟାପଲ୍ଲୀ ଗ୍ରାମର କାପଲ ଜୟନ୍ତୀ (୩୩) ନାମ୍ନୀ ଜଣେ ମହିଳା ଆଜି ଅପରାହ୍ନ ୪ ଘଣ୍ଟା ସମୟରେ ଧାନ ବିଲରୁ ଫେରିବା ସମୟରେ ନିକଟସ୍ଥ ପ୍ରାଥମିକ ବିଦ୍ୟାଳୟ ନିକଟରେ ପ୍ରବଳ ବର୍ଷା ହେବା ସହ ବଜ୍ରପାତ ଘଟିଥିଲା। ଏହି ବଜ୍ରପାତରେ ଜୟନ୍ତୀ ଗୁରୁତର ଆହତ ହୋଇ ବିଲ ମଧ୍ୟରେ ଟଳିପଡିଥିଲେ।ଏହି ଘଟଣା ସମ୍ପର୍କରେ ପରିବାର ବର୍ଗ ଓ ଗ୍ରାମବାସୀ ଜାଣିବା ପରେ ୧୦୮ ଆମ୍ବୁଲାନ୍ସ ଯୋଗେ ହିଞିଳି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଚିକିତ୍ସା ନିମନ୍ତେ ସ୍ଥାନାନ୍ତରିତ କରିଥିଲେ।କିନ୍ତୁ ଉପସ୍ଥିତ ଡାକ୍ତର ଜୟନ୍ତୀଙ୍କୁ ମୃତ୍ୟୁ ଘୋଷଣା କରିଥିଲେ।ତେବେ ପରବର୍ତ୍ତୀ ମୁହୂର୍ତ୍ତରେ ଜୟନ୍ତୀଙ୍କ ମୃତ ଶରୀରକୁ ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ଏମକେସିଜି ମେଡ଼ିକାଲକୁ ସ୍ଥାନାନ୍ତରିତ କରାଯାଇଥିଲା।ଜୟନ୍ତୀଙ୍କ ଅନ୍ତିମ ସଂସ୍କାର ନିମନ୍ତେ ତାଙ୍କ ପରିବାର ବର୍ଗଙ୍କୁ ସ୍ଥାନୀୟ ସରପଞ୍ଚ ବି.ଆପୋୟାଙ୍କୁ ହରିଚନ୍ଦ୍ର ଯୋଜନାରେ ୨ ହଜାର ଟଙ୍କା ସହାୟତା ପ୍ରଦାନ ନିମନ୍ତେ ବିଡିଓ ଶ୍ରୀ ସୁବ୍ରତ କୁମାର ଜେନା ପରାମର୍ଶ ଦେଇଥିବା ସୂଚନା ମିଳିଛି।ଏହି ଅବସରରେ ସ୍ଥାନୀୟ ସମିତି ସଭ୍ୟ ବି. ସଞ୍ଜିତା ଙ୍କ ସମେତ ଗ୍ରାମବାସୀ ଉପସ୍ଥିତ ରହି ସହଯୋଗ କରିଥିଲେ।
