ବ୍ରହ୍ମପୁର,୨୫/୦୮/୨୦୨୨:
ସ୍ବାୟତ ଶାସନ ଦିବସ ପାଳନ ଅବସରରେ ବ୍ରହ୍ମପୁର ମହାନଗର ନିଗମ ତରଫରୁ ବ୍ରହ୍ମପୁର ମିଡ଼ିଆ ଏକାଦଶ ଏବଂ କର୍ପୋରେଟର ଏକାଦଶ ମଧ୍ୟରେ ଏକ କ୍ରିକେଟ୍ ମ୍ୟାଚ୍ ଖଲିକୋଟ ବିଶ୍ବବିଦ୍ୟାଳୟ ପଡ଼ିଆ ଠାରେ ଗୁରୁବାର ଖେଳାଯାଇଥିଲା। ଅତିଥି ଭାବେ ବ୍ରହ୍ମପୁର ବିଧାୟକ ବିକ୍ରମ କୁମାର ପଣ୍ଡା, ମେୟର ସଂଘମିତ୍ରା ଦଳେଇ, ଡେପୁଟି ମେୟର ବିବେକ ରେଡ୍ଡି, ଅତିରିକ୍ତ ଆୟୁକ୍ତ ନିଳମାଧବ ଭୋଇ ପ୍ରମୁଖ ଯୋଗଦେଇଥିଲେ । ପ୍ରଥମେ ବ୍ୟାଟିଂ କରିଥିବା କର୍ପୋରେଟର ଏକାଦଶ ୧୩ ଓଭର୍ରେ ସମସ୍ତ ଉଇକେଟ୍ ହରାଇ ୭୯ ରନ୍ କରିଥିଲେ । ଦଳ ତରଫରୁ ତ୍ରିପତି ପାତ୍ର ସର୍ବାଧିକ ୨୪ ରନ୍ କରିଥିଲେ । ମିଡ଼ିଆ ଏକାଦଶର ଗୋପାଳ ରେଡ଼ି ଦୁଇ ଓଭର୍ରେ ୯ ରନ୍ ଦେଇ ୩ଟି ଉଇକେଟ୍ ନେଇଥିଲେ । ଆବଶ୍ୟକ ରନ୍ର ପିଛାକରି ମିଡ଼ିଆ ଏକାଦଶ ମାତ୍ର ଗୋଟିଏ ଉଇକେଟ୍ ହରାଇ ୯ ଓଭର୍ରେ ୮୦ ରନ୍ କରି ବିଜୟୀ ହୋଇଥିଲା । ଓପିନିଂ ଯୋଡ଼ି ଆଶୀର୍ବାଦ ରାଉତ ସର୍ବାଧିକ ୫୪ ରନ୍ କରି ଅପରାଜିତ ରହିଥିଲେ। ତାଙ୍କର ଏହି ଇନିଂସରେ ୪ଟି ଛକା ଏବଂ ୫ଟି ଚୌକା ରହିଥିଲା । ତାଙ୍କୁ ମ୍ୟାନ ଅଫି ଦି ମ୍ୟାଚ୍ ଘୋଷଣା କରାଯିବା ସହିତ ୪ଟି ଛକା ପାଇଁ ବିଜେଡ଼ି ନେତା ଭୀମସେନ ଦଳେଇ ସ୍ବତନ୍ତ୍ର ଭାବେ ପୁରସ୍କୃତ କରିଥିଲେ । ଆମ୍ପାୟର ଭାବେ ସୂରଜ ଏବଂ ଈଶ୍ବର ଖେଳ ପରିଚାଳନା କରିଥିଲେ । ଆସନ୍ତା ୩୧ ତାରିଖରେ ସ୍ବାୟତ ଶାସନ ଦିବସ କାର୍ଯ୍ୟକ୍ରମରେ ଚାମ୍ପିୟନ୍ ଦଳକୁ ଟ୍ରଫି ପ୍ରଦାନ କରାଯିବ।
