ବ୍ରହ୍ମପୁର, ୧୮/୧୦/୨୦୨୨ :ଦିବ୍ୟ ଜୀବନ ସଂଘ ମହିଳା ଶାଖା ତରଫରୁ ପବିତ୍ର ସଂକ୍ରାନ୍ତି ଉପଲକ୍ଷେ ହନୁମାନ ଚାଳିଶା, ସୁନ୍ଦରକାଣ୍ଡ ପାରାୟଣ ଓ ନାରାୟଣ ସେବା ଅନୁଷ୍ଠିତ ହୋଇଯାଇଛି। ପବିତ୍ର କାର୍ତ୍ତିକ ମାସ ଉପଲକ୍ଷେ ଆଶ୍ରମ ପରିସରରେ ପୂଜା ପାଉଥିବା ଗୁରୁ ଗୋବିନ୍ଦଙ୍କ ନିକଟରେ ପ୍ରାତଃ ସମୟ ଓ ସଂଧ୍ୟା ସମୟରେ ୧୦୮ ଆରତୀ ଦର୍ଶନ କରିବା ପାଇଁ ବହୁ ଭକ୍ତ ସମାଗମ ହେଉଛନ୍ତି। ଆସନ୍ତା ୨୬ ତାରିଖ ଠାରୁ ୧୫ ଦିନ ବ୍ୟାପି ଶ୍ରୀରାମ ଚରିତ ମାନସ ପାରାୟଣ, ପ୍ରବଚନ, ଶ୍ରୀକୃଷ୍ଣ ଚରିତାମୃତ, ୨୪ ପ୍ରହର ନାମଯଜ୍ଞ, ନାରାୟଣ ସେବା, ବସ୍ତ୍ର ବଣ୍ଟନର ଆୟୋଜନ କରାଯାଇଛି। ଏଥିରେ ଓଡ଼ିଶାର ପ୍ରସିଦ୍ଧ ପ୍ରବଚିକା କମଳ କୁମାରୀ ପାଣିଗ୍ରାହୀ, ଶ୍ରୀଧର ଭାଇ, ଗୋପିନାଥ ବାବାଙ୍କ ସମେତ ପୂର୍ଣ୍ଣାହୁତି ଦିବସରେ ଦିବ୍ୟ ଜୀବନ ସଂଘର ବରିଷ୍ଠ ସନ୍ଥ ବ୍ରହ୍ମସାକ୍ଷାତକାରାନନ୍ଦ ସରସ୍ବତୀ ମହାରାଜ ଉପସ୍ଥିତ ରହି ଆଶୀର୍ବଚନ ପ୍ରଦାନ କରିବାକୁ ସ୍ଵୀକୃତି ପ୍ରଦାନ କରିଛନ୍ତି। କାର୍ତ୍ତିକ ମାସ ଶେଷ ସୋମବାର ଦିନ ପ୍ରାୟ ୧୦୦୦ ଲୋକଙ୍କୁ ବସ୍ତ୍ର ବଣ୍ଟନ ସହିତ ପ୍ରାୟ ୩୦୦୦ ଭକ୍ତଙ୍କ ପାଇଁ ପ୍ରସାଦ ବ୍ୟବସ୍ଥା କରାଯିବ ବୋଲି ଦିବ୍ୟ ଜୀବନ ସଂଘ ଦକ୍ଷିଣାଞ୍ଚଳ ସମନ୍ୱୟ ସମିତିର କୋଷାଧ୍ୟକ୍ଷ ଶାନ୍ତିଭୂଷଣ ପଣ୍ଡା ସୁଚନା ଦେଇଛନ୍ତି।
