ଆଞ୍ଚଳିକ କଳିଙ୍ଗ ହର୍ବାଲ ମେଳା ଉଦଯାପିତ, ବ୍ୟବସାୟରେ ଫିକା ପକାଇଲା ଅଦିନିଆ ବର୍ଷା

0
141

ବ୍ରହ୍ମପୁର,୨୦/୦୩/୨୦୨୩: ସ୍ଥାନୀୟ କେସି ହାଇସ୍କୁଲ ଖେଳ ପଡିଆ ଠାରେ ଚାଲିଥିବା ୧୩ ତମ ଆଞ୍ଚଳିକ କଳିଙ୍ଗ ହର୍ବାଲ ମେଳା ଉଦଯାପିତ ହୋଇଯାଇଛି। ଏହି ଉଦଯାପନୀ ସନ୍ଧ୍ୟାରେ ମୁଖ୍ୟ ଅତିଥି ଭାବେ ଓଡ଼ିଶା ବନ ଉନ୍ନୟନ ନିଗମର ବ୍ରହ୍ମପୁର ଶାଖା ପରିଚାଳକ ଶଙ୍କର୍ଷଣ ବେହେରା ଯୋଗ ଦେଇଥିଲେ। ସେହିପରି ମୁଖ୍ୟ ବକ୍ତା ଭାବେ ଖଲ୍ଲିକୋଟ କ୍ଲଷ୍ଟର ବିଶ୍ଵ ବିଦ୍ୟାଲୟର ଅବସରପ୍ରାପ୍ତ କୁଳପତି ପ୍ରଫେସର ମନ୍ମଥ ପାଢ଼ୀ ଯୋଗ ଦେଇଥିବା ବେଳେ ସମ୍ମାନିତ ଅତିଥି ଭାବେ ଅବସପ୍ରାପ୍ତ ଅଧ୍ୟାପକ ପ୍ରଫେସର ସନ୍ତୋଷ କୁମାର ଦାସ ଯୋଗ ଦେଇଥିଲେ। ବ୍ରହ୍ମପୁର ବନଖଣ୍ଡ ଅଧିକାରୀ ସନି ଖୋଖରଙ୍କ ସଭାପତିତ୍ବରେ ଆୟୋଜିତ ଏହି ସଭାରେ ଅନ୍ୟମାନଙ୍କ ମଧ୍ୟରେ ବ୍ରହ୍ମପୁର ବନଖଣ୍ଡର ଅତିରିକ୍ତ ବନ ସଂରକ୍ଷକ ଏ ମାଧବୀଲତା , ଡାକ୍ତର ରୁଦ୍ର ପ୍ରସାଦ ରଥ ମଞ୍ଚାସିନ ଥିଲେ। ଗତ ୫ ଦିନ ଧରି ଚାଲିଥିବା ଏହି ମେଳାରେ ଆୟୁର୍ବେଦ ଔଷଧି ବ୍ୟବସାୟରେ ଫିକା ପକାଇଥିଲା ଅଦିନିଆ ବର୍ଷା। ବର୍ଷା କାରଣରୁ ଅନେକ ସମୟରେ ଆସୁଥିବା ଲୋକେ ଫେରି ଯିବାର ଦେଖିବାକୁ ମିଳିଥିଲା। ସେହିପରି ଚଳିତ ମେଳାରେ ବ୍ୟବସାୟ ରେ ଉତ୍ତମ ପ୍ରଦର୍ଶନ ପାଇଁ ଶ୍ରେଷ୍ଠ ସରକାରୀ ସଂସ୍ଥା ଭାବରେ ଓଡ଼ିଶା ବନ ଉନ୍ନୟନ ନିଗମ, ଶ୍ରେଷ୍ଠ ବୈଦ୍ୟ ଭାବେ କଟକର ବୈଦ୍ୟ ମହେଶ୍ୱର ମିଶ୍ର, ଶ୍ରେଷ୍ଠ ଏନ ଜି ଓ ଭାବେ ଖୋର୍ଦ୍ଧାର ଭବାନୀ ଚାରିଟେବଲ୍ ଟ୍ରଷ୍ଟ, ଶ୍ରେଷ୍ଠ ଉତ୍ପାଦକ ସଂସ୍ଥା ଭାବେ ମାନ୍ନା କୋଲ୍ଡ ପ୍ରେସ ଅଏଲ ବ୍ରହ୍ମପୁର, ଶ୍ରେଷ୍ଠ ଟ୍ରେଡର ଭାବେ ୟୋଗା ଫର୍ ଆୟ କୁ ସମ୍ମାନିତ କରିବା ସହ ସ୍ମାରକୀ ଚିହ୍ନ ଓ ମାନପତ୍ର ପ୍ରଦାନ କରାଯାଇଥିଲା। ସେହିପରି ସାଂସ୍କୃତିକ କାର୍ଯ୍ୟକ୍ରମ ରେ ଅଂଶଗ୍ରହଣ କରିଥିବା ସମସ୍ତ ଛାତ୍ରଛାତ୍ରୀ ଶିକ୍ଷାନୁଷ୍ଠାନ ଓ ବ୍ୟକ୍ତି ବିଶେଷଙ୍କୁ ମାନପତ୍ର ପ୍ରଦାନ କରାଯାଇଥିଲା। ସେହିପରି ଡାକ୍ତର ସାଗର ରଞ୍ଜନ ତ୍ରିପାଠୀ କାର୍ଯ୍ୟକ୍ରମ ସଂଯୋଜନା କରିଥିବା ବେଳେ ଏସିଏଫ ଡାକ୍ତର ରୁଦ୍ର ରଥ ଧନ୍ୟବାଦ ଅର୍ପଣ କରିଥିଲେ।

LEAVE A REPLY

Please enter your comment!
Please enter your name here