ବୁଗୁଡ଼ା, ୨୨/୧୨/୨୪ : ବୁଗୁଡାର ନିକଟସ୍ଥ ପ୍ରସିଦ୍ଧ ଶୈବପୀଠ ତଥା ପର୍ଯ୍ୟଟନ କ୍ଷେତ୍ର ବୁଦ୍ଧଖୋଲର ପାଦଦେଶରେ ବୁଗୁଡା ପିପୁଲସ ହାଇ ସ୍କୁଲର ୧୯୯୨ ମସିହାର ଦଶମ ଶ୍ରେଣୀ ଛାତ୍ରମାନଙ୍କର ଡିସେମ୍ବର ୨୨ ତାରିଖ ଦିନ ଏକ ବନ୍ଧୁ ମିଳନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ପ୍ରାରମ୍ଭରେ ପିପୁଲସ ହାଇ ସ୍କୁଲର ସେହି ସମୟର ଶିକ୍ଷକ ବୃନ୍ଦଙ୍କୁ ପାରମ୍ପରିକ ଢୋଲ ଏବଂ ଶଙ୍ଖ ବାଦ୍ୟ ଦ୍ଵାରା ନିମନ୍ତ୍ରଣ କରି ଗୁରୁପୂଜନ କାରାଯାଇଥିଲା। ଏଥିସହ ସ୍ବର୍ଗତ ଶିକ୍ଷକମାନଙ୍କ ତୈଳଚିତ୍ରରେ ପୁଷ୍ପ ପ୍ରଦାନ ପୂର୍ବକ ନୀରବ ପ୍ରାର୍ଥନା କରାଯାଇଥିଲା ।
ଦ୍ୱିତୀୟ ପର୍ଯ୍ୟାୟରେ ଗୁରୁମାନଙ୍କର ଉପଦେଶ ଗ୍ରହଣ ସହିତ ଗୁରୁଜୀ ମାନଙ୍କୁ ଧନ୍ୟବାଦ ପତ୍ର ପ୍ରଦାନ କରାଯାଇଥିଲା । ତୃତୀୟ ପର୍ଯ୍ୟାୟରେ ଛାତ୍ରମାନେ ନିଜନିଜର ଅନୁଭବ ବକ୍ତବ୍ୟ ରଖିଥିଲେ । ପରିଶେଷରେ ପ୍ରସାଦ ସେବନ ସହିତ ଏହି କାର୍ଯ୍ୟକ୍ରମର ସମାପ୍ତି ହୋଇଥିଲା । କୁଞ୍ଜବିହାରୀ ପ୍ରଧାନ ଓ ଡକ୍ଟର ସ୍ଥିତଧୀ ରଥଙ୍କ ଦ୍ଵାରା କାର୍ଯ୍ୟକ୍ରମର ପରିଚାଳନା କରାଯାଇଥିବା ବେଳେ ଏଥିରେ ଦିଲ୍ଲୀପ ଦାଶ, ଅଜୟ ପାଢ଼ୀ, ଅନ୍ନଦା ପାଢ଼ୀ, ବିଷ୍ଣୁ ସାହୁ, ଶଙ୍କର ସାହୁ ଓ ସାଧୁ ବିଶୋଇ ସହଯୋଗ କରିଥିଲେ । ଏଥିରେ ଭାଗ ନେଇଥିବା ୬୫ ଜଣଙ୍କୁ ସ୍ମୃତି ଫଳକ ପ୍ରଦାନ କରାଯାଇଥିଲା ।
