ବୁଗୁଡା, ୨୯/୧/୨୫ : ଦକ୍ଷିଣ ଘୁମୁସର ବନଖଣ୍ଡ ଅନ୍ତର୍ଗତ ବୁଗୁଡା ବନାଞ୍ଚଳରେ କୃଷ୍ଣସାର ମୃଗ ଗଣନା ଶେଷ ହୋଇଥିବା ବେଳେ ଗତ ଗଣନା ଅପେକ୍ଷା ୨୪.୯୫ % ବୃଦ୍ଧି ହୋଇଥିବା ଜଣାପଡିଛି। ୨୦୨୫ ମସିହା ଜାନୁଆରୀ ୨୯ ତାରିଖ ଦିନ ହୋଇଥିବା କୃଷ୍ଣସାର ମୃଗ ଗଣନା ପ୍ରକାରେ ବୁଗୁଡା ବନାଞ୍ଚଳରେ ୫୩୨ ଅଣ୍ଡିରା କୃଷ୍ଣସାର, ୧୬୨୩ ମାଈ କୃଷ୍ଣସାର ଓ ୬୦୯ ଯୁବ କୃଷ୍ଣସାର, ଏହିପରି ମୋଟ ୨୭୬୪ କୃଷ୍ଣସାର ମୃଗ ଥିବା ଜଣାପଡିଛି। ଗତ ୨୦୨୩ ରେ ହୋଇଥିବା ଗଣତିରେ ୫୨୪ ଅଣ୍ଡିରା କୃଷ୍ଣସାର, ୧୩୩୬ ମାଈ କୃଷ୍ଣସାର ଓ ୩୫୨ ଯୁବ କୃଷ୍ଣସାର, ଏହିପରି ମୋଟ ୨୨୧୨ କୃଷ୍ଣସାର ମୃଗ ଥିଲେ। ଦୁଇ ବର୍ଷରେ ମୋଟ ୫୫୨ କୃଷ୍ଣସାର ମୃଗ ଅଧିକ ହୋଇ ପ୍ରାୟ ୨୪.୯୫ % ମୃଗ ସଂଖ୍ୟା ବୃଦ୍ଧି ପାଇଛି। ଅଣ୍ଡିରା କୃଷ୍ଣସାର ମୃଗ ମାତ୍ର ୮ ଟି ଅଧିକ ହୋଇଥିବା ବେଳେ ମାଈ କୃଷ୍ଣସାର ସଂଖ୍ୟା ୨୮୭ ବୃଦ୍ଧି ପାଇଛି। ସେହିପରି ଯୁବ କୃଷ୍ଣସାର ମୃଗ ୨୫୭ ଟି ଅଧିକ ହୋଇଛି। ସେହିପରି ପୋଲସରା ବନାଞ୍ଚଳରେ ମୋଟ ୫୪୩ କୃଷ୍ଣସାର ମୃଗଥିବା ଗଣନାରୁ ଜଣାପଡିଛି। କର୍ମଚାରୀଙ୍କ ଦ୍ଵାରା ଗଣତିରୁ ଏହି ସଂଖ୍ୟା ଜଣାପଡ଼ିଥିବା ବେଳେ ସେଟ ଲାଇଟ ଗଣନା ପରେ ସଠିକ ସଂଖ୍ୟା ଜଣାପଡିବ।
