ବୁଗୁଡା, ୩/୪/୨୫: ରାଜ୍ୟ ସରକାର ୨୦୨୫-୨୬ ଶିକ୍ଷା ବର୍ଷରୁ ନୂତନ ଶିକ୍ଷାନୀତି ପ୍ରଚଳନ କରିଛନ୍ତି। ପୂର୍ବରୁ ୫+ ରେ ପ୍ରଥମ ଶ୍ରେଣୀରେ ପ୍ରବେଶ ହେଉଥିବା ବେଳେ, ଚଳିତ ଶିକ୍ଷା ବର୍ଷରୁ ୫+ ରେ ପ୍ରାକ ପ୍ରାଥମିକ “ଶିଶୁ ବାଟିକା” ରେ ପ୍ରବେଶ କରିବେ। ପୂର୍ବ ପରମ୍ପରା ପ୍ରକାରେ ଶିଶୁ ଶ୍ରେଣୀରେ ଖଡ଼ି ଛୁଆଁ ହେଉଥିଲା। ପରବର୍ତ୍ତୀ ବର୍ଷ ଶିଶୁ ଶ୍ରେଣୀରୁ ପ୍ରଥମ ଶ୍ରେଣୀକୁ ଯାଉଥିଲେ। ସେହି ପରି ବର୍ତ୍ତମାନ ୫+ ବର୍ଷରେ ” ଶିଶୁ ବାଟିକା ” ରେ ଖଡ଼ିଛୁଆଁ ଆରମ୍ଭ ହେଉଅଛି। ଏଥିପାଇଁ ଏପ୍ରିଲ ୨ ତାରିଖ ଦିନ ସମଗ୍ର ରାଜ୍ୟରେ ପ୍ରବେଶ ଉତ୍ସବ ଓ ଖଡ଼ିଛୁଆଁ କାର୍ଯ୍ୟକ୍ରମ ଅନୁଷ୍ଠିତ ହୋଇଅଛି। ମାନ୍ୟବର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହାର ଶୁଭାରମ୍ଭ କରିଛନ୍ତି। ଏହି ପରିପ୍ରେକ୍ଷୀରେ ବୁଗୁଡା ବ୍ଳକରେ ମଧ୍ୟ ପ୍ରବେଶ ଉତ୍ସବ ଓ ଖଡ଼ିଛୁଆଁ ପାଇଁ ବୁଗୁଡା ଗୋଷ୍ଠୀ ଶିକ୍ଷା କାର୍ଯ୍ୟାଳୟ ପକ୍ଷରୁ ସମଗ୍ର ବୁଗୁଡା ବ୍ଳକରେ ଶିକ୍ଷା ସଚେତନତା ରଥ ପରିକ୍ରମା କରିଥିଲା। କାର୍ଯ୍ୟକ୍ରମକୁ ବୁଗୁଡା ତହସିଲଦାର ତାପସ ରାଉତ ଓ ଗୋଷ୍ଠୀ ଶିକ୍ଷା ଅଧିକାରୀ ଚିନ୍ମୟ ମହାପାତ୍ର ଦ୍ୱୟଙ୍କ ଦ୍ୱାରା ଶୁଭାରମ୍ଭ ହୋଇଥିଲା। ଶିକ୍ଷା ରଥ ସହ ଉଭୟ ତହସିଲଦାର ଶ୍ରୀ ରାଉତ ଓ ବିଇଓ ଶ୍ରୀ ମହାପାତ୍ର ଏବଂ ଏବିଇଓ ଓ ଶିକ୍ଷକ ଶିକ୍ଷୟିତ୍ରୀ ବୃନ୍ଦ ବୁଗୁଡା ସହର ପରିକ୍ରମା କରି ସଚେତନତା ସୃଷ୍ଟି କରିଥିଲେ। ସନ୍ଧ୍ୟାରେ ଶିକ୍ଷା ରଥ ମାଣିତରାରେ ପ୍ରବେଶ କରିଥିଲା। ମାଣିତରା ହାଇ ସ୍କୁଲ ପ୍ରଧାନ ଶିକ୍ଷକ କୈଳାଶ ଚନ୍ଦ୍ର ମହାରଣା ଓ ସିଆରସିସି ଶଶିକାନ୍ତ ପାତ୍ରଙ୍କ ନେତୃତ୍ବରେ ବହୁ ଶିକ୍ଷକ ଓ ଶିକ୍ଷା ପ୍ରେମୀ ଶିକ୍ଷା ରଥକୁ ସ୍ୱାଗତ କରିଥିଲେ।
