ଗଞ୍ଜାମ,୨୧/୦୭/୨୦୨୦(ଟୁକୁନା ପ୍ରଧାନ) – : ଗଞ୍ଜାମ ଜିଲ୍ଲା ବେଗୁନିଆପଡା ବ୍ଲକ ଅନ୍ତର୍ଗତ ବେରୁଆଁବାଡ଼ି ଗ୍ରାମକୁ ବୁଧବାର ଠାରୁ ଆଗାମୀ ପାଞ୍ଚଦିନ ପାଇଁ ସଟ୍ ଡାଉନ ଘୋଷଣା କରିଛନ୍ତି ସ୍ଥାନୀୟ ସରପଞ୍ଚ ନୀଳାଞ୍ଚଳ ପାଢ଼ୀ l ଫଳରେ ୨୨ତାରିଖ ଠାରୁ ଆସନ୍ତା ୨୬ତାରିଖ ଯାଏଁ ସଟ୍ ଡାଉନ ରହିବ l ବାରମ୍ବାର ସମ୍ପ୍ରତି ଗଞ୍ଜାମ ଜିଲ୍ଲାର ବିଭିନ୍ନ ସ୍ଥାନରେ କରୋନା ସଂକ୍ରମଣ ଦ୍ରୁତ ଗତିରେ ବୃଦ୍ଧିପାଉଥିବା ବେଳେ ବେଗୁନିଆପଡା ବ୍ଲକ ଏଥିରୁ ବାଦ ପଡିନି l ପ୍ରତିଦିନ କେଉଁଠି ନା କେଉଁଠି ପଜିଟିଭ୍ ବାହାରୁଥିବାରୁ ସାଧାରଣରେ ଚିନ୍ତା ପ୍ରକାଶ ପାଇଛି l ଏପରିସ୍ଥଳେ ବେରୁଆଁବାଡ଼ିରେ କିଛି ଲୋକ ଚିହ୍ନଟ ହୋଇଥିବା ଦୃଷ୍ଟିରୁ ସରପଞ୍ଚ ଶ୍ରୀ ପାଢ଼ୀ ଜିଲ୍ଲା ପ୍ରଶାସନ, ବ୍ଲକ ପ୍ରଶାସନ ଏବଂ ପୁଲିସ ସହ ଆଲୋଚନା କରି ଏହି ପଦକ୍ଷେପ ନେଇଛନ୍ତି l ଗ୍ରାମକୁ ପାଞ୍ଚଦିନ ପାଇଁ ସମ୍ପୂର୍ଣ୍ଣ ସଟ୍ ଡାଉନ କରିଥିବାରୁ ଆବଶ୍ୟକୀୟ ସାମଗ୍ରୀ ଆଗୁଆ ମହଜୁଦ କରି ରଖିବା ପାଇଁ ଲୋକଙ୍କୁ ସଚେତନ କରାଯାଇଥିବା ପ୍ରକାଶ କରିଛନ୍ତି ଶ୍ରୀ ପାଢ଼ୀ l ବାରମ୍ବାର ସଚେତନତା ସତ୍ତ୍ୱେ କିଛି ଲୋକ ନିୟମ ମାନୁନଥିବାରୁ ଚିନ୍ତା ପ୍ରକଟ କରିଛନ୍ତି ସରପଞ୍ଚ ଶ୍ରୀ ପାଢ଼ୀ l ତେଣୁ ଗ୍ରାମରେ ପୁଲିସର ଦୃଢ କାର୍ଯ୍ୟାନୁଷ୍ଠାନ ଆବଶ୍ୟକ ବୋଲି ସରପଞ୍ଚ ଶ୍ରୀ ପାଢ଼ୀ ପ୍ରକାଶ କରିଛନ୍ତି l
