ବ୍ରହ୍ମପୁର, ୧୩/୦୨/୨୦୨୨:
ଗୋଳନ୍ଥରା ଥାନା ଅନ୍ତର୍ଗତ ଜାତୀୟ ରାଜପଥ ୧୬ ହରିପୁର ଛକରେ ସକାଳ ୭ଟା ସମୟରେ ଏକ ଇନୋଭା କାର ନଂ – ଏମଏଚ୍ ୧୫ , ବିଏକ୍ସ ୪୩୩୧ ବ୍ରହ୍ମପୁର ପଟୁ ଆନ୍ଧ୍ର ଅଭିମୁଖେ ଯାଉଥିବା ବେଳେ ଡିଭାଇଡର ପିଟି ହେବାସହ ଦୁର୍ଘଟଣାଗ୍ରସ୍ତ ହୋଇଥିଲା । ଘଟଣା ପରେ କାରରେ ବସିଥିବା ଡ଼୍ରାଇଭର ସହ ଦୁଇଜଣ ଯୁବକ ଦୌଡି ପଳାଇଥିଲେ । କାର ପଛଚକା ଦୁଇଟି ଫାଟିଯିବା ଯୋଗୁଁ କାରଟି ଅଟକି ଯାଇଥିଲା । ଅଞ୍ଚଳର ପଂଚାୟତ ନିର୍ବାଚନ ପାଇଁ ପୁଲିସ ପାଟ୍ରୋଲିଂ ବେଳେ କାରଟି ରାସ୍ତା ମଝିରେ ଥିବା ଦେଖି ଥାନାକୁ ନିଆଯାଇ ସେଠାରେ କାରଟିକୁ ଟିକିନିକି ତନଖି କରିଥିଲେ । କାର ଭିତରୁ ଗଞ୍ଜେଇ ଗନ୍ଧ ବାହାରିବାରୁ ଡିକି ଭାଙ୍ଗି ସେଥିରେ ୧୦୨ ପ୍ୟାକେଟରେ ଥିବା ଗଞ୍ଜେଇ ପ୍ରାୟ ୧କୁଇଣ୍ଟାଲ ୮୪କେଜିକୁ ପୋଲିସ ଜବତ କରିଛି । ଏକ ମାମଲା ରୁଜୁ କରି ଫେରାର ଆସାମୀଙ୍କୁ ଧରିବା ପାଇଁ ପ୍ରୟାସ କରିବାକୁ ଥାନା ଅଧିକାରୀ ବିବେକାନନ୍ଦ ମହନ୍ତ ପ୍ରତିକ୍ରିୟା ରଖିଛନ୍ତି । ସୂଚନା ମୁତାବକ ଏହି ଜାତୀୟ ରାଜପଥରେ ନିୟମିତ ଭାବେ ବିଭିନ୍ନ ଚୋରା ଗଞ୍ଜେଇ ବେପାରଙ୍କୁ ଧରିଥିଲେ ମଧ୍ୟ ଅନେକେ ଏପରି ଗଞ୍ଜେଇ ସହିତ ଗାଡ଼ିଛାଡ଼ି ଫେରାର ହୋଇଯାଉଥିବା ସାଧାରଣ ଘଟଣା ହେଉଅଛି ।
