ଭୁବନେଶ୍ୱର,୦୪/୦୨/୨୦୨୫: ନ୍ୟାସନାଲ୍ ଡିଫେନ୍ସ୍ କଲେଜର୧୭ ଜଣିଆ ପ୍ରତିନିଧିମଣ୍ଡଳୀ ଆଜି ରାଜଭବନରେ ରାଜ୍ୟପାଳ ଡ. ହରି ବାବୁ କମ୍ଭମ୍ୟାଟିଙ୍କୁ ସାକ୍ଷାତ କରିଛନ୍ତି। ଅଭିଷେକ ହଲ୍ ଠାରେ
ରାଜ୍ୟପାଳଙ୍କ ସହ ବାର୍ତ୍ତାଳାପ ସମୟରେ ଓଡିଶାର ଦୃତ ପ୍ରଗତିକୁ ପ୍ରତିନିଧିମଣ୍ଡଳୀ ପ୍ରଶଂସା କରିଛନ୍ତି ।
ଭାରତୀୟ ସ୍ଥଳ ସେନା, ବାୟୁସେନା, ନୌସେନା ଏବଂ ବେସାମରିକ ସେବାର ବରିଷ୍ଠ ଅଧିକାରୀ-ତଥା- ମିତ୍ରରାଷ୍ଟ୍ର ବ୍ରାଜିଲ, ଦକ୍ଷିଣ ଆଫ୍ରିକା, ନେପାଳ ଓ ବାଂଲାଦେଶରୁ ଆସିଥିବା ବରିଷ୍ଠ ପଦାଧ୍ୟାକାରୀଙ୍କ ସହ ବାତ୍ତାଳାପ ସମୟରେ ରାଜ୍ୟପାଳ ଡ. କମ୍ଭମ୍ଟି ଓଡ଼ିଶାର ଦ୍ରୁତ ପ୍ରଗତି ସଂପର୍କରେ ସୂଚନା ଦେଇ ଦେଶର ଶ୍ରେଷ୍ଠ ପ୍ରଗତିଶୀଳ ରାଜ୍ୟମାନଙ୍କ ମଧ୍ୟରେ ଓଡ଼ିଶା ପରିଗଣିତ ହୋଇଛି ବୋଲି କହିଥିଲେ । ଏତଦ୍ବ୍ୟତୀତ ଓଡ଼ିଶାର ଶାସନ ବ୍ୟବସ୍ଥା, ଉନ୍ନୟନ ନୀତି, ଦକ୍ଷତା ବିକାଶ, ବୈଷୟିକ କୌଶଳ, ରାଜ୍ୟ ଓ କେନ୍ଦ୍ର ସରକାରଙ୍କ ଦ୍ବାରା ପ୍ରବର୍ତ୍ତିତ ବିଭିନ୍ନ ଉନ୍ନୟନ ଓ କଲ୍ୟାଣ ମୂଳକ ଯୋଜନାର କାର୍ଯ୍ୟାନ୍ଵୟନ କ୍ଷେତ୍ରରେ ଓଡ଼ିଶା ସରକାର ଗ୍ରହଣ କରିଥିବା ପଦକ୍ଷପ ସଂପର୍କରେ ଅବତାରଣା କରି ଦେଶର ସାମଗ୍ରିକ ବିକାଶରେ ରାଜ୍ୟର ଭୂମିକା ସଂପର୍କରେ କହିଥିଲେ। ପ୍ରତି ସଂସ୍ଥାରେ ଦକ୍ଷତା ବିକାଶର ଗୁରୁତ୍ବ ସହ ଛାତ୍ରଛାତ୍ରୀ ମାନଙ୍କୁ ଭବିଷ୍ୟତ ପାଇଁ ଦକ୍ଷ କରିବା ଉପରେ ରାଜ୍ୟପାଳ ଗୁରୁତ୍ବ ଆରୋପ କରିଥିଲେ।ଓଡ଼ିଶାର ଖଣିଜ ସଂପଦ, ଶିଳ୍ପାୟନ, ବନ୍ଦରମାନଙ୍କର ବିକାଶ, ଜାତୀୟ ରାଜପଥ, ବିମାନ ବନ୍ଦର, ସୁବିସ୍ତୀର୍ଣ୍ଣ ବେଳାଭୂମି, ପର୍ଯ୍ୟଟନ କ୍ଷେତ୍ରର ବିକାଶ ସଂପର୍କରେ ଆଲୋଚନା କରି ଗତ ଜାନୁୟାରୀ ମାସରେ ଭୁବନେଶ୍ୱର ଠାରେ ଅନୁଷ୍ଠିତ ପ୍ରବାସୀ ଭାରତୀୟ ଦିବସ ଏବଂ ଉତ୍କର୍ଷ ଓଡ଼ିଶା କାର୍ଯ୍ୟକ୍ରମ ଓଡ଼ିଶାର ପ୍ରଗତିକୁ ଅଧିକ ତ୍ବରାନ୍ବିତ କରିବ ବୋଲି ରାଜ୍ୟପାଳ କହିଥିଲେ। ରାଜ୍ୟପାଳଙ୍କ ପ୍ରମୁଖ ଶାସନ ସଚିବ ଏନବିଏସ୍ ରାଜପୁତ ମଧ୍ଯ ପ୍ରତିନିଧ୍ଵ ମଣ୍ଡଳୀଙ୍କ ସହ ବାର୍ତ୍ତାଳାପରେ ସାମିଲ ହୋଇଥିଲେ। ନ୍ୟାସନାଲ ଡିଫେନ୍ସ କଲେଜରୁ ଆସିଥିବା ପ୍ରତିନିଧିମାନେ ଭାରତ ଭ୍ରମଣ ଅବସରରେ ଓଡ଼ିଶା ପରିଦର୍ଶନର ଅନୁଭୂତି ବର୍ଣ୍ଣନା କରିଥିଲେ ଏବଂ ଓଡ଼ିଶାର ଦ୍ରୁତ ପ୍ରଗତି ସହିତ ଓଡ଼ିଶାର ଜନସାଧାରଣ ଏବଂ ତାଙ୍କର ସକରାତ୍ମକ ମନୋଭାବ, ମାନବ ସମ୍ବଳ, ନୀତି ଏବଂ ଶାସନ ବ୍ୟବସ୍ଥାର ଭୂୟସୀ ପ୍ରଶଂସା କରିଥିଲେ। ତୃଣମୂଳସ୍ତରରୁ ରାଜ୍ୟସ୍ତର ପର୍ଯ୍ୟନ୍ତ ଓଡ଼ିଶାର ଶାସନ ବ୍ୟବସ୍ଥା, ସାମାଜିକ ଓ ଅର୍ଥନୈତିକ ବ୍ୟବସ୍ଥା ସଂପର୍କରେ ଜ୍ଞାନ
ଆହରଣ କରିବା ହେଉଛି ଏହି କାର୍ଯ୍ୟକ୍ରମର ଉଦ୍ଦେଶ୍ୟ ବୋଲି ପ୍ରତିନିଧିମଣ୍ଡଳୀ କହିଥିଲେ।
